Хаҗ кылучы кулланмасы чыкты

«Идел-хаҗ» төбәкара хаҗ мәркәзе хаҗ кылучыларның китапханәсен тагын бер китапка баетты: хаҗ кылучыларның мөрәҗәгатьләрен исәпкә алып, «Хаҗ кылучы кулланмасы (Хәнәфи мәзһәбе буенча хаҗ һәм гомрә. Йолаларны үтәү кагыйдәләре). 2 нче өлеш» брошюрасын чыгарды. Хаҗ кылучыларга уңайлы булсын өчен, ул рус һәм татар телләрендә чыгарылган.

Хаҗ мәркәзеннән алынган хәбәрләргә караганда, «Хаҗ кылучы кулланмасы»ның беренче өлешендә хаҗны оештыруга кагылышлы мәгълүмат бирелсә, брошюраның икенче өлешендә хаҗны кылу йолаларына зур урын бирелә.

Хаҗ кылучыларга тәкъдим ителә торган әдәбиятның үзенчәлеге шунда: монда хаҗны имам Әбү-Хәнифә мәзһәбе буенча кылу кагыйдәләре бирелә, дип яза «Татар-Информ». Бу Татарстан, аерым алганда, «Идел-хаҗ» мәркәзе аша хаҗга китүчеләрнең күпчелеге — Хәнәфи мәзһәбендә, дип белдерә мәркәзнең матбугат хезмәте. Әлеге китап ТР мөселманнары Диния нәзарәте тарафыннан да расланган.

Бу кулланма «Идел-хаҗ» мәркәзе аша хаҗга баручыларның җыелмасына керә һәм хаҗиларга бушлай бирелә.