Россиянең иң мөһим үзенчәлеге —милләтара дуслык

Шушы көннәрдә Домодедово шәһәрендә Татар мәдәни үзәге эшли башлады. Аны ачу тантанасында Домодедово шәһәре администрациясе башлыгы Леонид Ковалевский, Мәскәү өлкәсенең икътисад министры Вячеслав Крымов, Мәскәү өлкәсе Думасы депутаты Владимир Аристархов, Татарстанның Россиядәге вәкиллеге рәисенең беренче урынбасары Илдар Мөхәммәдияров, Мәскәү өлкәсе татар милли-мәдәни автономиясе рәисе Фәрит Мохтасаров, Домодедово шәһәренең милли-мәдәни автономиясе рәисе Фоат Солтанов катнаштылар.

Әлеге үзәк өчен биналар җирле хакимият тарафыннан бирелде, ә инде ремонт инвесторлар һәм Домодедово шәһәре милли-мәдәни автономиясе булышлыгы белән ясалды, дип хәбәр итә Татарстанның Россиядәге вәкиллеге матбугат үзәге.

Бинада музей, китапханә, уку өчен сыйныфлар, актлар залы урнашкан. Монда туган телне яхшылап өйрәнергә, татар халкының традиция һәм гореф-гадәтләре белән якыннанрак танышырга мөмкин булачак.

"Россиянең иң мөһим үзенчәлеге —милләтара дуслык. Домодедово җитәкчелеге моны яхшы аңлый һәм төрле милләт вәкилләренең үзара дус һәм тату яшәве өчен бөтен көчен куя. Әлеге татар мәдәни үзәге татар мәдәниятен үстерү белән генә чикләнмәс, ә төрле милләт вәкилләренең җыелу һәм берләшү урынына әйләнер», дип ассызыклады Илдар Мөхәмәдияров үзенең чыгышында.