«Шәрык» яшьләр өчен «Ачык ишекләр көне» чарасы уздыра

Ниһаять, яңа уку елы башланып китте. Җәй айларында тынып торган университет, институт, техникум буйлары хәзер студентлардан гөрләп тора. Шәһәрдә яшьләрнең артуы яшьләр оешмалары өчен бигрәк тә сөенечле. Алар, ниһаять, үз эшләрен башлап җибәрә алачак.

«Шәрык» татар-милли яшьләр клубы турында ишетмәгән кеше сирәктер. Ул татар милләте, аның үткәне, бүгенгесе, киләчәгенә битараф булмаган яшьләрне берләштерә, дип яза Интертат.ру.

14 сентябрь көнне «Шәрык» яшьләр өчен «Ачык ишекләр көне» чарасы уздыра. Әле быел гына укырга кергән, татар милләтенең язмышына битараф булмаган 1 курс студентлары өчен бу чарада катнашу аеруча мөһим. Чөнки нәкъ менә шушы көнне клубның тарихы турында мәгълүмат бирелә, барлык булган һәм яңа проектларга презентация үткәреләчәк. Очрашу милли уеннар, җыр-биюләр белән үрелеп барачак.

Чарада катнашучылар өчен сюрприз да әзерләнгән: махсус кунаклар белән очрашу уздырыла. Ә тәмле чәй исә берәүне дә битараф калдырмас.

Чара сәгать 18:00 дә башлана. Анда теләге булган һәркем катнаша ала.