Санкт - Петербург һәм Ленинград өлкәсе төбәкара Татар милли - мәдәни җәмгыяте ел да милл&#

Рәшид Мәһдиев җитәкчелегендәге Санкт — Петербург һәм Ленинград өлкәсе төбәкара Татар милли — мәдәни җәмгыяте ел да милләттәшләр өчен дини бәйрәм оештыра. Хәзер һәр елны мәдәни — дини чара оештыру матур йолага әйләнде.

Быел да августның соңгы көнендә шәһәрнең нәкъ уртасында урнашкан «Ностальжи» ресторанында Ифтар мәҗлесе узды. Әлеге кунакчыл аш йортының җитәкчесе дә Рәшид Мәһдиев (Петербургтан). Җәмгыятьнең башкарма директоры Равил Гирфанов (Башкортостаннан). Мәҗлескә күренекле милләттәшләр, җәмгыять активистлары, ветераннар һәм яшьләр чакырылган иде. Балаларның булуы Ифтар ашына ямь — матурлык өстәде. Ленинград өлкәсеннән дә кунаклар булды. Кронштадттагы «Татулык» татар милли — мәдәни җәмгыяте вәкилләрен әлеге оешма рәисе Гүзәлия Нимченова алып килгән иде. Хәзрәт Наил Тугушев Коръән һәм вәгазь укыды, дип яза «Татар-информ». Мәҗлестә Коръән сүрәләре яңгыраганда илаһи, күңелләргә рухи ял бирүче тынычлык урнашты. Наил хәзрәтне шәһәрдә күп мөселманнар белә һәм хөрмәт итә. Ифтар — дога тыңлау белән бергә милләттәшләр белән аралашу мөмкинлеге дә бирә, ул шуның белән дә кыйммәт.