Яңа технологияләр чорында шәмаилләрне кристаллар ярдәмендә дә ясый башладылар

26 августта «Кол Шәриф» мәчетендә «Изге сүз яктылыгы» дип аталган шәмаилләр күргәзмәсе ачыла.

Әлеге күргәзмә «Татар шәмаиле сәнгате» проекты кысаларында Ураза бәйрәменә багышлап, «Казан Кремле» музей-ядкәрлеге, ислам мәдәнияты музее һәм Казандагы «Татар сәнгате һәм мәдәнияты клубы» иҗтимагый оешмасы тарафыннан оештырыла.

Татар халкы мәдәниятында шәмаил сәнгатьнең иң таралган төре булып санала. Шәмаилләрне кәгазьдә дә, керамик плитәдә дә, пыялада да ясыйлар, чигеп тә эшлиләр, дип яза "Татар-Информ"

Яңа технологияләр чорында шәмаилләрне кристаллар ярдәмендә дә ясый башладылар. Бу, үз чиратында, изге сүзнең тылсымлылыгын җиткерергә мөмкинлек бирә.

Күргәзмәгә куелачак шәмаилләрне кристаллар ярдәмендә инкрустацияләү (агачтан, сөяктән яки таштан ясалган әйберләргә чокып урнаштыру өчен төрле материалдан ясалган бизәкләр) белән кристаллайзер остаз Наталья Сәярова шөгыльләнгән.