18 августта «Булгария» теплоходы һәлакәткә юлыкканга 40 көн була

18 августта «Булгария» теплоходы һәлакәткә юлыкканга 40 көн була.

«ВКонтакте» социаль челтәренең «БУЛГАРИЯ» Хәтер, Ярдәм, Дөреслек» төркеме администрациясе әлеге уңайдан махсус акция оештыра.

Әлеге төркемнең администраторы Светлана Привалова «Татар-информ» агентлыгы хәбәрчесенә белдергәнчә, акция 18 августта 11.30 сәгатьтә Елга портында узачак. Акциядә катнашучылар 10 июльдә булган фаҗигадә һәлак булучыларны бер минут тынлык белән искә алачак.

Бу көнне күккә кара тасмалар бәйләнгән һәм фаҗигадә һәлак булучыларның исемнәре язылган 122 һава шары очыртып җибәреләчәк. Аларның 5 се — алтынсу төстә, әлеге шарлар теплоходта булган авырлы хатыннарны гәүдәләндерә.

Светлана Привалова хәбәр иткәнчә, хәзерге вакытта акциядә 300 гә якын кеше катнашырга җыена. Оештыручылар акциягә битараф калмаска һәм әлеге чараны оештыруда ярдәм итәргә яки 18 август көнне Елга портына килергә чакыра.

Искәртеп узабыз, теплоход 10 июльдә Татарстанның Кама Тамагы районында Куйбышев сусаклагычы территориясендә батты.

Нәтиҗәдә, 122 кеше һәлак булды, шуларның 28 е — балалар. 79 кеше коткарылды.

«Булгария»не Идел төбеннән 2011 елның 26 июлендә күтәрделәр.

«Татар-Информ» МА