Татарстан тарихында беренче тапкыр дәүләт дәрәҗәсендә ифтар ашы оештырыла

Татарстанда беренче тапкыр республика күләмендә ифтар ашы оештырыла. 26 августта узачак «Рамазан — 2011» ифтарында Татарстан президенты Рөстәм Миңнеханов катнаша. Дини тантанада 1000 кешелек урын әзерләнә. «Рамазан — 2011» республика ифтарын Татарстан Диния нәзарәте президент аппараты, хөкүмәт, Казан мэриясе белән берлектә оештыра. Әмма бу ифтар ашында чакырылган кунаклар гына катнаша ала.

26 августта узачак ифтарның программасына килгәндә, президент кунаклары кичке җидедә Кол Шәриф мәчетендә җыела. Мәчеттә мөфти Илдус Фәиз һәм Татарстан президенты Рөстәм Миңнеханов чыгыш ясар дип көтелә. 19.54 сәгатьтә авыз ачып, ахшам намазы укыгач, Ярминкә мәйданында ифтар мәҗлесе башланып китә.

Ярминкә мәйданында ук «Зәкәт» фонды хәйрия акциясе оештырачак. Ифтар ашы тәмамлангач, өлкән кешеләрне махсус автобуслар өйләренә кайтарып куячак.

Шулай итеп, Татарстан тарихында беренче тапкыр дәүләт дәрәҗәсендә ифтар ашы оештырыла һәм анда республика президенты катнаша.