Санкт - Петербург Җәмигъ мәчетендә ифтар ашы узачак

Санкт — Петербург Җәмигъ мәчетендә 20 августта ифтар ашы узачак.

Соңгы еллардагы гадәт буенча Аллаһ йортында ифтар ашын Санкт-Петербург Татар милли-мәдәни мохтәрияте (рәисе Рәис Яркәев), Петербург Сабантуе фонды (президенты Ирек Галиев), Санкт — Петербург Милләтләр йорты директоры урынбасары Ислам Гатин, эшкуарлар — Харрас Мулеев, Ринат Әхмәтшин, Илдар Сәлкәев, Илгизәр Шәйдуллин, Айрат Исхаков һәм башкалар оештырачак. Биредә төрле илләрдән вәкилләр, мөселман оешмалары да чакырыла. Мәчет бинасы иркен булганлыктан, аның ишеге һәркемгә ачык, дип яза «Татар-Информ». Шунлыктан дини чарада төньяк башкалада яшәүче һәр милләт вәкилен дә очратырга мөмкин. Ифтар ашына яшьләр дә күп килә. Ризык 300 — 400 кешегә исәпләнә, ир — атлар өчен табын беренче катта, хатын — кызларга икенче катта әзерләнә. Ихлас күңелдән оештырылган мәҗлестә ислам дине кануннары хөрмәтләнә. Җәмигъ мәчетендә ифтар ашы, Ураза һәм Корбан бәйрәмнәре оештыру күркәм йолага әйләнде.