Тукай районында Рамазан аена багышланган 500 дән артык чара үткәрелгән

Тукай районында 6 ай эчендә Рамазан аена багышланган 500 дән артык чара үткәрелгән. Районның 5 мәхәлләсендә очрашулар оештырылган, вәгазьләр сөйләнгән, дип хәбәр итә ТР мөселманнары Диния нәзарәте.

«Июнь-июль айларында 15 мәктәптә махсус җәйге лагерьлар оештырылды. Әлеге лагерьларда ислам әхлагы, дин нигезләре, гарәп теле дәресләреннән сабак бирелде. Лагерьлардан ата-аналар да бик канәгать калды, Аллаһы Тәгалә насыйп әйләсә, киләсе елларда мондый төрдәге мөселман лагерьларын арттыру нияте бар», — дип үзенең теләген җиткерде Тукай районы мөхтәсибе урынбасары, дәгъват бүлеге җитәкчесе Рәфыйкъ хәзрәт Гыйльфанов.

Шунысы да игътибарга лаек, Тукай районының «Якты юл» газетасында мөхтәсибәткә аерым бер кушымта каралган. Дин әһелләре район халкын очрашуларда гына түгел, атнага 2 тапкыр чыга торган газета аркылы да ислам әхлагы, дини бәйрәмнәр, шәригать кануннары белән һәрдаим таныштырып бара.