«Булгария» теплоходы баткан урында ялыктыргыч эш бара

Хәзерге вакытта «Булгария» теплоходы баткан урында бертөрле, ялыктыргыч эш бара. Краннарның берсе «Булгария» янында су төбен чистарта.

Искәртеп узабыз, кичә теплоходны турыларга елга төбендәге калкулык комачаулады.

Су төбен чистарту эшләре төн уртасында башланды. Теплоходны су төбеннән күтәрү буенча оператив штаб җитәкчесе Виктор Олерский ачыклык керткәнчә, хәзерге вакытта төп бурыч — судноның авышлыгын ким дигәндә 3 градуска кадәр киметү.

Виктор Олерскийның сүзләренә караганда, теплоходны су төбеннән күтәрү эшләре план нигезендә бара, дип яза «Татар-Информ».

Графикны үтәүгә бары тик һава торышы гына комачауларга мөмкин. Искәртеп узабыз, кичә «Булгария»не су төбеннән күтәрү эшләре яшенле яңгыр аркасында тукталды. Бу эштә тагын бер кыенлык бар. Белгечләрнең берсе ачыклык керткәнчә, эштә елга төбендәге дуен бик тә комачаулый — ул теплоходны үзенә суыра.