Иң яхшы тәрбия – ислам тәрбиясе

Актаныш районындагы Күҗәкә авылы мәчетендә ачылган лагерьга 40 лап бала йөри. Иң кечкенәсенә -3, калганнар 13-14 яшьлек, дип яза «Актаныш таңнары» газеты.

«Иң яхшы тәрбия — ислам тәрбиясе. Мәчеттә начарлыкка өйрәтмиләр. Мәчеткә килгән баланың йөзе нурлы», — ди «Халидә» мәчетенең имам-хатибы Рәмис Гыйльметдинов.

Күҗәкәдә дини лагерь беренче тапкыр 2004 елда Руслан хәзрәт Мортазин тарафыннан оештырыла. Узган ел ул җәй буе диярлек эшләгән. Быел июнь башында ачылган, алга таба эшләвен дәвам итәчәк. Монда шәһәрдән кунакка кайткан балалар да бик теләп йөриләр икән.

Биредә кызлар иртәнге сәгать тугыздан 11 гә, ә малайлар алардан соң бергә кадәр укыйлар. Өйлә намазына калып, намаз укырга да өйрәнәләр.