Россия төбәкләре мөфтиләре кайгы уртаклашты

Иделдә булган фаҗига уңаеннан Ямал-Ненец автономияле округы мөфтие Хәйдәр хәзрәт Хафизов, Ингушетия Республикасы мөфтие Исса Хамхоев, Мәскәү мөфтие, Мәскәү шәһәре һәм Үзәк төбәк мөселманнары Диния нәзарәте рәисе һәм Чувашия Республикасы мөселманнары Диния нәзарәте рәисе Әлбир Крганов, Кабарда-Балкария Республикасы мөселманнары Диния нәзарәте рәисенең тышкы элемтәләр буенча урынбасары Хөсәен Вәлид кайгы уртаклашты, дип яза «Татар-Информ».

Алар ТР мөселманнары Диния нәзарәтенә юллаган телеграммаларында үзләре һәм мөфтиятләре исеменнән теплоход белән һәлакәткә очраган кешеләрнең туганнарының тирән кайгысын уртаклашуын хәбәр итә.

Аллаһы Тәгаләнең үлгән кешеләрнең гөнаһларын ярлыкавын һәм җәннәт бакчаларын насыйп итүен теләп кала. Бу кайгының бөтен Россия кешеләре йөрәгенә үтеп керүен, суда батып үлгән кешеләрнең туганнарына — сабырлык, һәлакәткә очраганнарның рухына тынычлык бирүен сорый.

Аерым алганда, Әлбир Крганов «катастрофаның сәбәпләрен ачыклау киләчәктә мондый фаҗигаләрне булдырмаска мөмкинлек бирер дип уйлыйбыз», — дип белдерде.