Пенза өлкәсендәге татар авылларында Сабантуйлар хәмерсез уза

Пенза өлкәсендә урнашкан Каменский, Белинский районнарында татар милли бәйрәме — Сабантуй уздыру уңаеннан киңәшмә үткәрелде. Һәрбер «Алты авыл»га керә торган торак пунктлар өчен бәйрәм мондый көннәрдә узачак: Решетино — 3 июнь, Кобылкино — 4 июнь, Кикино — 11 июнь, Кочалейка -12 июнь, Телятино -12 июнь, Мочалейка -18 июнь, Кутеевка -25 июнь.

Күп кенә татар «Алты авыл» торакларында Сабантуй бер ничә ел рәттән хәмерсез уза дип Ислам-Ньюз агентлыгына Каменский, Белинский, Пачелмский районнары имам мөхтәсибе Хәмзә Еникеев сөйләгән. — «Быел да бертавыштан бәйрәмне хәмерсез үткәрергә карар ителде»,-дигән ул.

Мисал өчен, Качалейка авылында Сабантуйга 60 лап бәрән чалына. Аның итеннән пешерелгән аш белән барлык теләгән кеше сыйлана ала.Сабантуй башланыр алдыннан күмәкләшеп намаз уку гадәткә кергән. Мөселманнар мул уңыш, хәерле көннәр, яңгырлар сорап, Аллаһы Тәгаләгә ялвара.