“Ярдәм” фонды Бөтенроссия күрмәүчеләр оешмасының татар бүлегенә котлау хаты юллады

Бу елны Бөтенроссия күрмәүчеләр оешмасының татар бүлегенә 90 ел тула. Шул уңайдан, "Ярдәм" ислам хәйрия фонды президенты Исмәгыйлев Илһам оешма директоры Федорин Владимир Алексеевич исеменә котлау хаты җибәрде.

«Сезнең оешма күрмәүче инвалидларны тернәкләндерү өлкәсендә зур эш алып бара. Сезнең ваемсыз булмавыгыз аркасында, инвалидлар белән эшлекле һәм иҗади эш алып барганыгызга күрә, алар яңа шартларга күнегә, яңа белем, һөнәр ала. Миннән һәм безнең барлык хезмәткәрләр исеменнән изге теләкләребезне кабул итегез», — диелә котлау хатында.

Шулай ук оешмага бүләк итеп Л.М. Смирновның «Эштән ләззәт» (Радость Труда) дигән тарихи-документаль әсәре бирелде. Бу китап «Нур» күрмәүчеләр нәшрияте тарафыннан Луи Браиль телендә бастырылды. Шулай ук, китапның аудио варианты, начар күрүчеләр өчен эре шрифта басылганы һәм күрүчеләр өчен — кесә төре дә бар.