Быел Россиядән 20,5 мең кеше хаҗ кыла ала

Быел Россиядән 20,5 мең кеше хаҗ кыла ала. Федерация Советында узган хаҗ кылуны оештыруга багышланган утырышта шушы санда квота бирелүе билгеле булды.

Югары палата рәисе урынбасары, РФ Хөкүмәтенең хаҗ эшләре буенча җаваплы вәкиле Илъяс Умаханов фикеренчә, хаҗ кылу мөмкинлеге иң беренче чиратта моңа кадәр хаҗга бармаганнарга биреләчәк. Кемнең ничә тапкыр бу изге сәфәргә юл тотуын белү өчен хаҗиларның махсус мәгълүматлар банкы булдырылачак.

Россиянең хаҗ кылучы төп төбәкләре — Дагыстан, Чечня, Ингушетия һәм Татарстан санала. Алга таба башка төбәкләрдә дә хаҗилар санын арттырырга уйлыйлар, дип яза Интертат.ру

1945-1990 елларда бары тик 900 кеше хаҗга барган булса, хәзерге вакытта Россиядән меңәрләгән мөселман изге сәфәргә юл тота. Россия иң зур квоталы илләр арасына керә. Әмма елдан-ел хаҗ кылырга теләүчеләр саны арта, шуңа күрә бүгенге квота гына җитми дип санаучылар бар.