ΙΙΙ Халыкара саммит - Kazansummit-2011

Инде хәбәр ителгәнчә, 20-21 июнь көннәрендә Казанда Ислам бизнесы һәм финанслары буенча ΙΙΙ Халыкара саммит — Kazansummit-2011узачак. «Быел саммитның төп өлешен инвестиция мәсьәләләренә багышларга уйлыйбыз», — ди саммитны оештыру комитеты рәисе, ТР Кече һәм урта эшмәкәрлекне үстерү комитеты рәисе Линар Якупов хәбәрчебез белән әңгәмәсендә. Бу юлы саммитның төп чарасы — инвестиция форумы булачак. «Моңа кадәр узган ике саммитта теориягә күбрәк игътибар бирелгән булса, хәзер конкрет эшләргә өлгереп җиттек. Казан саммиты Татарстан, аның башкаласы белән кызыксынган инвесторлар өчен капка ролен дә үти», -дип белдерде оештыру комитеты рәисе.

Ислам бизнесы һәм финанслары буенча узган елгы саммитта 30 ил һәм өлкәдән вәкилләр катнашкан булса, быел тагын да күбрәк булыр дип көтелә. Алар арасында мөселман дөньясыннан әйдәп баручы банкирлар һәм инвесторлар, Ислам конференциясе оешмасы каршындагы Ислам сәүдә-сәнәгать палатасы, вәкилләре булачак. Форум кысаларында Россиянең 6 төбәгенең — Татарстан, Башкортстан, Ингушетия, Удмуртия республикалары, Оренбург, Ульновски өлкәләренең инвестиция мөмкинлекләре презентацияләнәчәк, дип яза tatar-inform

Узган ел саммит барган көннәрдә Татарстан башкаласында беренче тапкыр Казан хәләл ярминкәсе оештырылган иде. Быелгы саммитка туры китереп хәләл ярминкәсе кабат оештырылачак. Быел ярминкә саммит барган «Пирамида» янәшәсендә — Казан спорт сарае мәйданында 19-21 июнь көннәрендә узачак.