Май бәйрәмнәрендә Свердловск мәчетләрендә өмәләр уздырыла

Свердловск өлкәсенең Сысертск районы Октябрьск бистәсендәге «Нур» мәчетендә «Субботник-2011» («Өмә — 2011») дип аталган чара үткәрелде. Бу чарада мәчеткә килүчеләр һәм мәчет карамагында булган мәдрәсә укучылары катнашкан. Бу турыда «Ислам.ру» хәбәрчесенә «Нур» мәчетенең имам-хатибы Хәкимҗан Шәрипов хәбәр итте. Мәчет тирәлеге җыештырылганнан соң, өмәдә катнашучылар пылау һәм пешкән ризыклардан авыз иттеләр.

Билгеләп үтик, Октябрьскида мондый чара беренче мәртәбә генә үткәрелми. Узган ел бу чара җирле идарә органнары белән берлектә узды. Шул сәбәпле, бистәнең үзәк өлешеннән биш "КамАЗ" чүп чыгарылды.

Красноуфимск шәһәре мәчете әһелләре мондый чараны мөселман зиратында 7 майда уздырырга ниятли. Бу көннәрдә мәчет һәм мөселман зиратларында мондый өмәләр Красноуфимск шәһәре буенча уздырылып килә.