Саратов өлкәсенең мөселман хатын – кызлары аш-су хәзерләү осталыкларын күрсәттеләр.

Узган атнада Саратов өлкәсе Балашов шәһәренең өстәмә белем бирү учрежденияләрнең берсендә аш-су хәзерләү осталыгы буенча бәйге узды. Шунда ук «Родничок» («Чишмә») оешмасының вәкиле Әминә Юнкина да укый.

Бу бәйгедә төрле халык аш-сулары тәкъдим ителде — татар, итальян, рус, украин, әрмән һәм башкалар. Татар халык ашларын Әминә Юнкина тәкъдим итте.

Жюри әгъзалары (өстәмә белем бирү учреждениясенең директоры, курслар җитәкчесе, аш-су хәзерләү сәнгате укытучысы, психолог) иң яхшы ашамлыкны сайларга тиеш иде.

Катнашучылар төрле милләт табынының үзенчәлекләре белән таныштырды. Әминә татар халкы табынының милли традицияләргә бай, ризык әзерләү кызыклы һәм оригиналь булганлыгын билгеләп үтте. Шулай ук татарлар ислам дине вәкилләре булганлыктан аларның ризыгына дуңгыз ите һәм спиртлы эчемлекләр кермәвен өстәп куйды.

Моннан тыш бәйге барышында да бер милли ризык әзерләргә кирәк иде. Әминә исә ат итеннән «Азу» әзерләде. Жюри аны уңай бәяләде.

Бәйге нәтиҗәләре буенча Әминәгә беренче урын бирделәр, грамота тапшырдылар.