Казанда мөселман яшьләре арасында стритбол буенча шәһәрара ярышлар узды

17 апрельдә  Казан шәһәренең Идел буе районындагы 136 нчы мәктәптә стритбол* буенча мөселман яшьләре арасында шәһәрара ярышлар узды. Анда 8 команда катнашты: «Әниләр», «Әҗем», «Солтан», «Ризван», «Салихҗан» мәчетләре, «Исламны кабул итүгә 1000 ел исемендәге» мәдрәсә, РИУ, «Ак өмет» пансионаты.

Беренче урынны РИУ төркеме алды. Икенче урынга «Исламны кабул итүгә 1000 ел» мәдрәсәсе лаек булды. Өченче урын «Ак өмет» пансионатына бирелде.

Җиңүчеләргә дипломнар, грамоталар, кыйммәтле бүләкләр тапшырылды. Беренче урынны алган төркем күчмә кубокка лаек булды.

Ярышның үткәрү максаты — мөселман яшьләрен сәламәт яшәү рәвешенә чакыру.

ТҖ МДН алга таба да спорт, физкультура һәм савыктыру буенча чаралар уздырачак, шулай ук сәламәт яшәү принципларын таратачак. Һәм киләчәктә ТҖ МДН стритбол буенча үзенең җыелма командасын оештырачак, дип хәбәр итә ТҖ МДН мәгълүмат хезмәте.

*Стритбол инглизчәдән Streetball — урам баскетболы. АКШта XX гасырның 50нче елларында ярлы кварталларда барлыкка килә. Өч кешедән торган ике төркем баскетбол мәйданының яртысын тәшкил иткән кортта уйныйлар һәм тупны бер боҗрага ыргыталар.