Яшь мөселманнар өчен «Баллы табын» бәйрәме

10 апрельдә Свердловск өлкәсенең Сысертск шәһәр округының Октябрьский бистәсендә урнашкан «Нур» мәчете карамагындагы «Возрождение» («Яңарыш») мәдрәсәсендә уку елы тәмамлану сәбәпле, «Баллы табын» исемле балалар бәйрәме үткәрелде. Бәйрәмгә 2дән алып 10 яшькә кадәрге 30га якын бала җыелды. Екатеринбург шәһәрендәге «Шанс» («Өмет») хатын-кызлар клубының рәисе Розалия Әхмәтова сүзләренчә, балалар алдында «Яңарыш» мәдрәсәсенең укытучысы-  илаһият белгече Руслан Нурмаметов чыгыш ясады. Ул мәчетнең Аллаһка гыйбадәт кыла торган урын икәнлеге турында сөйләде. Урал дәүләт югары уку йортында укучы Малайзия студентлары рус телендә үзләренең илләре турында мәгълүмат бирделәр. Шуннан соң балаларга «Теремок» курчак театры спектакле күрсәтелде.

Алга таба балалар әти-әниләре белән мәдрәсәгә уздылар. Анда аларны мул табын көтә иде. Соңыннан викторина һәм уеннар үткәрелде, балаларга өстәл уеннары бүләк ителде.

Шунысын билгеләп үтик: мондый мәҗлес «Нур» мәчетендә инде 3 нче ел үткәрелә. Чараның максаты-яшь мөселманнарны мәчет белән таныштыру, ислам турында дөрес мәгълүмат бирү.