Казанда халыкара «Нәүрүз» театр фестивале узачак

Быел төрки халыкларның X халыкара «Нәүрүз» театр фестивале Казанда 30 майдан 3 июнгә кадәр узачак. Төрки халыкларның халыкара «Нәүрүз» театр фестиваленең юбилей җыены сәхнә сәнгатенең дөньякүләм зур вакыйгасы. Унынчы фестивальдә төрки дөньяның күренекле драма, курчак һәм урам театрлары спектакльләреннән торган төп программадан тыш катнашучы кунаклар исемлеге артачак, киң халык катламнарны җәлеп итүгә зур басым ясалачак, фестивальдә катнашучы һәр төрки халыкның милли үзенчәлеген һәм иҗади хәзинәләрен чагылдарган театраль концертлар оештырылачак.

Фестивальнең төп максаты Россия Федерациясендә һәм аннан читтә яшәүче төрки халыкларның иҗади элемтәләрен ныгыту һәм театраль мәдәниятләрен үзара баету. Фестивальне гамәлгә куючылар — Россия Федерациясе Мәдәният министрлыгы ярдәме белән Татарстан Республикасы Мәдәният министрлыгы, Россия Федерациясенең Театр эшлеклеләре берлеге, Татарстан Республикасының Театр эшлеклеләре берлеге, төрки халыкларның мәдәниятен һәм сәнгатен үстерү буенча «Тюрксой» халыкара оешмасы.

«Нәүрүз» театр фестиваленә 550 катнашучы һәм кунак җыйналачак. Татарстан башкаласына Германия, Япония, Төркия, Казахстан, Үзбәкстан, Төрекмәнстан, Молдова һәм Россиянең Якутия, Алтай, Тыва, Дагыстан, Хакасия кебек өлкәләреннән театр труппалары киләчәк.

«Нәүрүз» театр фестивале 2011 елның 30 маенда Казанда төрки халыклар театрларының бәйрәм парады һәм Г.Камал театры мәйданында узачак зур театраль концерт белән ачылачак. Фестивальнең махсус кунаклары: Лев Додин җитәкчелегендәге «Малый драматический театр — Театр Европы» (Санкт-Петербург) һәм дөнья музыкасы вәкиле, сихри тавыш иясе, якут җырчысы һәм артисткасы Степанида Борисова. Фестиваль тамашачыларын 40тан артык драма һәм курчак театрлары спектакльләре, ачык һавада урам театрлары тамашалары, күренекле музыкантлар концертлары, дәрвишләр биюләре һәм күп кенә кызыклы театраль тамашалар көтә. Чыганак Intertat.ru газетасы.