Бөгелмә шәһәрендә иң яхшы сәнгать эше буенча бәйге башланды

Бөгелмә шәһәрендә республика күләмендә ел саен бер тапкыр үткәрелә торган иң яхшы сәнгать эше буенча бәйге башланды. Бу бәйгедә теләгән һәр кеше катнаша ала. Алдагы елны конкурс мөселман архитектурасына багышланган иде, быел «Шәмаил» темасы сайланды.

«Узган ел катнашучылар Россиянең 8 шәһәреннән җыелды, быел без күбрәк эшләр күрергә ниятләнәбез. Эшләрне Татарстаннан гына түгел, ә Россиянең төрле төбәкләреннән, төрле милләт кешеләре җибәрә», — дип «Инфо-ислам» агентлыгына хәбәр итте Бөгелмә шәһәренең имам- мөхтәсибе Рөстәм хәзрәт Хәйруллин.

10 апрельдә Бөгелмә шәһәренең Үзәк мәчетендә җибәрелгән эшләрдән күргәзмә оештырылачак. Ул 14 көн дәвамында узачак. Аннан соң, күргәзмә Бөгелмәнең Мәдәният үзәгендә 2 атна барачак. Ай ахырында нәтиҗәләр ясалып, җиңүчеләр билгеләнәчәк.