АЛЛАҺЫМ! БИРГӘННӘРЕҢӘ МЕҢ ШӨКЕР!

Җәнәбел Хак! Синең хозурыңа,
Әле безнең бит кайтасы бар.
Фанилыкта ниләр майтарганны,
Җентекләп әле әйтәсе бар.

Сөйләшенгән гайбәт, кыек сүзгә,
Җавапны әле тотасы бар;
Дөньялыкның ләззәтләре өчен,
Ачуларыңны йотасы бар.

Харам ризык һәм эчемлек өчен,
Табарбызмы җавап сорауга?
Ни диярбез ышанулар өчен,
Йолдызнамәдәге юрауга?

Яныбызда ачлар булган чакта,
Ни әйтербез тамак туйганда,
Мосафирга ишек бикләп куйсак,
Карлы-бозлы яңгыр койганда?

Тыңларлармы безне аклансак та,
Хөкем гадел булар бит анда.
Уяндым да шушыларны уйлап,
Торалмый яттым бүген таңда.
Мәүлит Шакиров.