Күңелләре тулы изгелек

Усаклык бистәсе мәчетенең остаз-мөгаллимәләре җитәкчелегендә бер төркем шәкертләр “Ярдәм” мәчетенә килгәннәр иде инде. Без алар хакында “Мөслимә” газетасының 2 нче (194) санында язган идек. Аларның башка мөгаллимәләре дә үзләренең шәкертләрен “Ярдәм” мәчетенә алып килергә, күрмәүчеләр шөгыльләнә торган бүлмәләрне, аларның Брайль системасы белән Коръән укуларын карарга ниятләгән булганнар. Һәм узган атнакич көнендә егермедән артык шәкерт “Ярдәм” мәчетенә килделәр. Алар үзләренең сумкаларын тутырып, күрмәүчеләргә бик күп күчтәнәч-сый алып кигәннәр иде. Җомга көнендә ул күчтәнәчләр белән өстәл тутырып, күрмәүчеләрне кунак иттеләр. Күрмәүчеләр исә күчтәнәч китерүчеләр исәнлегенә Коръән укып, дога кылдылар.

Усаклык абыстайларына алар кылган дога хикмәте барып ирешер, иншә Аллаһ!
Менә шулай, кадерле милләттәшләрем, дин кардәшләрем, мәрхәмәтле булыйк! Остазбикә-мөгаллимә Рузидә Вәлиева шәкертләре ихласлар һәм уку тырышлыклары да күренеп тора.

Күрмәүчеләргә күрсәткән шәфкатьләре – мәрхәмәтләре үзләренә күп дәрәҗәләргә арттырылып кире кайтсын, дип телибез. Шәкертләр күрмәүчеләргә Коръән укырга өйрәтүчеләрне күреп, аларны тыңлап, сөйләшеп, үзләренә күп сабаклар алдылар. Барысына да Аллаһының рәхмәтләре яусын! Уңышлар телибез.

Әлмира ҺӘДИЯ