Депутатлар сихерчеләргә каршы

РФ Дәүләт Думасы депутатлары сихерчеләр, күрәзәчеләр, ым-томчыларга каршы көрәш башлап җибәрмәкче. Бу уңайдан Дәүләт Думасының икътисадый сәясәт һәм эшкуарлык комитеты «Реклама турындагы» законга төзәтмәләр кертергә тәкъдим итте. Яңа төзәтмәләр нигезендә сихерчелек, күрәзәчелек турындагы рекламаларны чикләү күздә тотыла, дип хәбәр итә «Regnum» мәгълүмат агентлыгы.

Яңа төзәтмәләр буенча мистик хезмәтләрне, лицензиясез генә халык медицинасы ярдәмендә дәвалаучыларны рекламалау тыелачак. Бу фикерне Россия Хакимияте хуплаган, депутатлар беренче укылыштан соң кабул иткән инде. Депутат Владимир Мединский әлеге закон танылган экстрасенс-күрәзәчеләр эшчәнлегенә зыян китермәячәк, ә менә законсыз рәвештә сихерчелек, күрәзәчелек белән шөгыльләнүне табышлы эшкә әверелдерүчеләр белән көрәшүдә яхшы чара булып торачак, дип саный.

Яңа төзәтмәләр шаманнар киң таралган өлкәләрдә ничек кабул ителер, әлегә билгеле түгел. Бурятия, Алтай, Якутия республикаларында моңа каршы чыгучылар табылыр, дип уйлый депутатлар. Шуңа күрә беренче укылыштан соң әлеге төбәкләрдән кайтаваз көтәләр.

Сүз уңаеннан, төрле им-томчы, күрәзәче, сихерчеләрдән зыян күрүчеләр шактый. Мисал өчен, Алтайда әледән-әле шаманнар дәваланганнан соң үлем очраклары теркәлә.