Дин вәкилләре дә наркоманиягә каршы көрәшә

Республикада «Мәк» операциясе башланды. Наркоманиягә каршы көрәштә хокук сакчыларын гына түгел, дин вәкилләрен дә җәлеп итәргә булганнар. Казан шәһәре башкарма комитеты аппаратының телләрне үстерү һәм иҗтимагый оешмалар белән хезмәттәшлек бүлеге башлыгы Ирек Арысланов ТР мөфтие Госман хәзрәт Исхакыйга бу чара кысаларында мәчетләрдә нарокманиягә каршы вәгазьләр белән чыгыш ясарга тәкъдим итте.

И.Арыслановның мөфтигә мөрәҗәгатендә: «Ел саен җәй-көз айларында ТР территориясендә, шул исәптән, Казан шәһәрендә дә, «Мәк» операциясе оештырыла. Аның максаты - наркотик матдәләр әзерләргә яраклы үсемлекләрне кулланылыштан алу. Әлеге акция кысаларында төрле оешмаларда профилактик чаралар да оештырыла.Сезгә дә акцяигә кушылырга тәкъдим итәбез һәм бу афәткә каршы көрәшү, профилактика максатыннан башкала мәчетләрендә наркомания темасына вәгазьләр оештыруыгызны үтенәбез», - диелгән.

Мөфти Госман Исхакый әлеге мөрәҗәгать уңаеннан Казан мәчетләренең имам-хатыйпларына наркоманиягә каршы чаралар үткәрергә күрсәтмә бирде.