Казанда наркотик матдәләрне юкка чыгару акциясе үтә

Бүген Россиянең Наркотиклар әйләнешен контрольдә тоту федераль хезмәтенең ТР буенча Идарәсе законсыз әйләнештән алынган наркотик матдәләрне юкка чыгару буенча чаралар күрәчәк.

Акция кысаларында Казандагы бер җинаятьчел төркемнән алынган 700 килограмм марихуана матдәсе яндырылачак. Әлеге зур күләмдәге наркотик матдә хокук сакчыларының тырышлыгы нәтиҗәсендә 2008 елның апрелендә кулга алынган.

Марихуана белән бергә 1,6 килограмм героин, 550 доза гашиш, 100 доза тирәсе синтетик наркотик матдә дә утка атылачак. Әлеге барлык әфъюн матдәләр дә 73 җинаять эше буенча дәлил булып торган.

Әлеге процесс законга ярашлы рәвештә үтсен өчен махсус комиссия булдырылган. Анда накоконтроль идарәсе , ТР Сәламәтлек саклау һәм ТР  Экология министрлыгы вәкилләре керә. Алар исемлек буенча һәрбер әйберне җентекләп тикшерегә тиеш.

Әйтергә кирәк, быелның башыннан гына да законсыз әйләнештән 30 килограмм наркотик матдә алынган.