Саратовтагы мөселман лагеренда «Дуслык фестивале» үтте

Саратов районы Усть-Курдюм бистәсендә мөселманнар өчен җәйге ял лагере эшли. Ул Идел буенда урнашкан «Заря» ял базасында оештырылган.

Лагерьда 150 егет ял итә. Егетләр арасында төрле милләт вәкилләре бар: татарлар да, казахлар да, чәченнар да, аварлар да, русслар да әзәрбайҗаннар да һ.б.лар. Алар смена дәвамында дин сабаклары алалар, Коръән, намаз укырга өйрәнәләр. Егетләрнең әйдаманнары «Шәех Сәет» мәдрәсәсе студентлары һәм укытучылары. Алар егетләргә ислам нигезләрен генә өйрәтеп калмыйлар, ә мөселманнар нинди булырга тиешлеген үз мисалларында күрсәтәләр.

Аланда егетләр өчен бик күп төрле чаралар оештырыла.Балаларның төрле милләттән булуын исәпкә алып, лагерь җитәкчелеге ел саен «Дуслык фестивале»н үткәрә. Фестивальне ачу тантанасында Саратов өлкәсе мөфтие Мөкәддәс хәзрәт Бибарсов, Милли-мәдәни берләшмәләр ассоциациясе президенты Сәлман хаҗи Мусаев, Саратов өлкәсе думасының җәмәгатьчелек белән элемтәләр һәм мәгълүмати сәясәт комитеты рәисе Андрей Россошанский һ.б. кунаклар катнашты. Аларның сәламләү сүзләренә җавап итеп, малайлар үз талантларын күрсәттеләр: төрле халык биюләрен биеделәр, җырлар башкардылар, гармунда уйнадылар, шигырьләр сөйләделәр.