Мәскәүдә хәйриячеләр җыела

10 июньдә Мәскәүнең Үзәк Бөек Ватан сугышы музеенда Бөтенроссия иганәче һәм хәйриячеләренең конфессияара ассамблеясе оештыручылары җыела. Хәйриячелек, иганәчелек белән шөгыльләнүче, ләкин төрле дин тотучы кешеләр, ниһаять, берләшергә булды. Алар бергәләшеп дини юнәлештәге эшкуарлык ярдәмендә мәдәни-агарту һәм мәгариф буенча күптөрле проектларны тормышка ашырырга ниятлиләр, дип хәбәр итә оештыручылар IslamRF.Ru сайтына.

Җыелыш уңаеннан эшкуарларга төрле проектлар тәкъдим ителәчәк. Алар Россиянең дәрәҗәсен күтәрү, ватанпәрвәрлек хисен арттыру, диннәр дуслыгын пропагандалау кебек өлкәләргә караган. 

Җыелышта катнашучылар хәйрия оешмаларының халык арасында дәрәҗәсен күтәрү, аларга ышанычны арттыру, хәйрия эшчәнлеген җәелдерү, халыкта гомумкешелек кыйммәтләрен тәрбияләү кебек мәсьәләләр турында сөйләшәчәк. Шулай ук дәүләт белән хәйрия оешмалары хезмәттәшлегенә кагылышлы законнар һәм Россия мәктәпләрендә укытыла башлаган «Диннәр тарихы» фәне турында халык арасында аңлату-агарту эшләре алып бару турында фикер алышу да каралган.