Ислам динен кабул итү көнен бәйрәмнәр рәтенә кертү тәкъдиме ДәүСоветта каралачак

Бүген Татарстан Республикасы Дәүләт Советының чираттагы утырышында Россиянең истәлекле көннәре исемлегенә Ислам динен кабул итү көнен дә кертү тәкъдиме белән РФ Дәүләт Думасына мөрәҗәгать проекты каралачак. Бу турыда Дәүләт Советының матбугат хезмәте хәбәр итә.

Татарстан депутатлары әлеге истәлекле көнне дә рәсми бәйрәмнәр рәтенә кертү «илдәге диннәр дуслыгын арттырыр һәм Россиянең дөньякүләм абруен ныгытуга нигез булыр иде», - дип белдерә. Әйтергә кирәк, күптән түгел генә РФ Федераль Җыенының Федерация Советы Россияне чукындыру көнен (28 июль) рәсми истәлекле көннәр исемлегенә кертү турындагы законны кабул иткән иде. Ул вакытта Амур өлкәсе сенаторы Амур Галләмов Ислам динен кабул итү көнен дә рәсми истәлекле көн итү фикере белән чыкты. Аның фикерен спикер Сергей Миронов та хуплады.

ТР Дәүләт Советы депутатлары исә әлеге тәкъдимне проект буларак эшләгәннәр. Бүгенге утырышта аны җентекләп тикшерәчәкләр.