Юксынып йөрәк әрни.

Сафуан Мулла Гали

Тегәрҗепкә тезде әни
Туксан тугыз төймәсен.
Асылташ кебек төймәләр -
Тик күз генә тимәсен…

Зөбәрҗәт кебек төймәләр
Балкыйлар ялт – йолт килеп.
Әйтерсең күз ачып – йомып,
Сабыйлар уйный көлеп…

… Ничә еллар тәсбих әйтеп,
Дисбесен тарткан әни.
Үзе юк шул инде хәзер –
Юксынып йөрәк әрни…

Төшләремә керә әни,
Тартып таныш дисбесен.
И әнием, Аллаһ сине
“Иң изге бәндәм” дисен!

…Кулымда әни дисбесе,
Күңелемдә - бер Аллам.
Тәсбих әйтеп, намаз укып,
Рухыма саулык алам…