Бүген, мөбарәк Рабигыль-әүвәл аеның 18нче көнендә (31нче августта), Татарстан Мөфтие Камил хәзрәт Сәмигуллин Нәзарәттә Әтнә муниципаль районы башлыгы Рөстәм Хисамиев белән очрашты.

Очрашу барышында район башлыгы Мөфтигә район тормышы турында сөйләде, татар-мөселман гореф-гадәтләрен саклауга юнәлтелгән чараларга аерым игътибар юнәлтте.

Рөстәм Хисамиев Камил хәзрәткә хәбәр иткәнчә, быелның 1нче сентябреннән, Татарстан Республикасы Рәисе Рөстәм Миңнехановның хәер-фатыйхасы белән, районда факультатив рәвештә гарәп теле дәресләре башланачак.

Әлеге дәресләр 3нче сыйныфтан өлкәнрәк укучылар өчен каралган. Дәресләр атнага ике тапкыр Олы Әтнә урта гомуми белем бирү мәктәбе базасында узачак. Хәзерге вакытта тыңлаучыларны туплау дәвам итә. Район башлыгы шулай ук гарәп теле укытучысын да тәкъдим итте.

Камил хәзрәт, үз чиратында, Рөстәм Хисамиевның башлангычын хуплады, аны тормышка ашыруда уңышлар теләде һәм аның әлеге эшне башлап йөрүче булуын билгеләп үтте.