Гаилә ядкәре.

Тәнзилә Габделхакова

Стенада гади сәгать,
Янына тәсбих элгән.
Төймәләре ничә язмыш,
Күпме гомерне күргән.

Әбисе тезгән төймәләр
Минем әнигә калган.
Әнкәй дисбе тарткан саен
Алда бәхет юраган.

Шул дисбене кулга алсам,
Җаныма җылы иңә.
Газиземнең кул җылысы
Гүя дисбедән килә.

Дисбе тартып, киләчәккә
Сәламәтлек юрыйбыз.
Гөнаһ кылсак, бер Алладан
Кичерүен сорыйбыз.

Стенага элгән дисбем
Көн дә алам кулыма.
Иман нуры торсын биреп
Миннән калган буынга.