Һәрбер өйдә хәләл ризык булсын!

2014 Мар 03

Аллаһы Тәгалә хозурында бәндәсе өчен нинди дәрәҗә билгеләнгәнен беләсегез килсә, аның халык арасында ничек макталуына игътибар итегез.
Хәдис

"Ярдәм” мәчетендәге "Хәләл мәҗлес” фестивале Мөхәммәд Әминнең Коръән укуы һәм Рамил хәзрәт Ибраһимовның дога кылуы белән башланып китте. Мәчеткә килүчеләрне Татарстан Диния нәзарәте хезмәткәре Илһам хаҗи Исмәгыйлев котлады. Зал кунаклар, ягъни бирегә килгән абыстайлар һәм яшь кызлар белән тулы иде.

Зал - гаҗәеп бизәлештә. Урындыклар, ак җәймәләр зәңгәрсу күбәләкләр белән каймаланган иде. Зал түренең сул ягында - "Хәләл” комитеты билгесе. Әлеге комитет рәисе урынбасары Ирек Җиһаншин үз эшләренең игелеклеге һәм хәләл ризык белән туклануның әһәмияте хакында җентекләп сөйләде. Алар ит комбинатларын, кош фабрикаларын да үз күзәтчелегендә тоталар. Җитәкчеләре Марат Низамов исеменнән дә сәлам тапшырды һәм хәләл ризык һәрбер өйдә булсын, диде. Хәзер балалар бакчаларында да, мәктәпләрдә дә балаларга хәләл ризык ашату мөмкинлеге бар.

Әйе, хәләл ризык белән туклану – кешенең, гаиләдегеләрнең дә сәламәтлеге дигән сүз. Аллаһы Тәгалә һәм Пәйгамбәребез (с. г. в.), шәригатебез безгә хәләл ризык белән генә туклануны боера. Һәрберебез үз гаиләсендә хәләл ризык белән тукланып яшәсә, гаилә дуслыгы да, аның бөтенлеге дә, балаларның сәламәтлеге дә, әдәп-әхлагы да арта дигән сүз.

Кичәдә шулай ук аш-су остасы Ленар Зарипов хәләл туйлар үткәрү, хәләл табыннар әзерләү серләренә төшендерде. Алар кешеләр өчен тантаналы мәҗлесләр дә үткәрә икән. Ихтыяҗ булганда, оешмаларга да, йортларга барып та бик күркәм табыннар үзерләп, кешеләрнең кәефен күтәрәләр, шатландыралар икән. Ленар Зарипов үзе бар дөньяда әзерләнә торган ризык әзерләү серләрен өйрәнгән.

Сүз уңаеннан, искә төшерик әле: Казанда узган Универсиада уеннарына килүчеләр дә хәләл ризыклардан шат булганнар икән. Кыскасы, хәләл хезмәт күрсәтүче оешмалар килгән иде.

Залны бизәү, кулинария осталарын күрсәтүдә Супер тамада Гамил Нур һәм башка оешма вәкилләре зур эш башкардылар, алар яшьләргә файдалы киңәшләрен бирделәр, мастер-класслар оештырдылар.

 

Гамил Нур эшләрендә профессионализм ягыннан һәркемгә үрнәк санала, шулай ук заманча технологияләрнең теләсә нинди ситуацияләрдә актив куллана белә. https://vk.com/gamilnur


Әлмира ҺӘДИЯ, җәмәгать эшлеклесе