Казанда “Мөселман модасы атналыгы”на әзерлек эшләре бара

2010 елның 25-29 октябрендә меңьеллык Татарстан башкаласы – Казанда “Мөселман модасы атналыгы” узачак, ул “Халыкара «Islamic clothes» мөселман киеме дизайнерлары конкурсы һәм дөньядагы мөселман модасының соңгы тенденцияләрен күрсәтү белән төгәлләнәчәк.

Бүгенге көндә конкурска билгеле модельерлардан, төрле дизайнер студияләре һәм мәктәпләреннән, шул исәптән, Индонезия, Гыйрак, Иран кебек чит илләрдән дә 30 дан артык гариза кабул ителгән, ә Төркия һәм Кувейт белән сөйләшүләр алып барыла.

Моннан тыш, оештыручылар тарафыннан мәдәни чаралар, танылган дизайнерлар белән мастер-класслар һәм төрле мавыктыргыч темаларга түгәрәк өстәлләр үткәрү планлаштырыла.

Конкурста катнашучыларның барысын да кыйммәтле бүләкләр, дипломнар көтә. Конкурста җиңүченең Гран-при бәясе 100 мең сум тәшкил итәчәк.

Конкурсның жюри составына Россия һәм чит ил мода индустриясе әһелләре, мәдәният мэтрлары һәм күренекле җәмәгать эшлеклеләре кертеләчәк.

Конкурсны Татарстан Республикасы мөселманнары Диния нәзарәте, Татарстан Республикасы һәм Россия Федерациясе дизайнерлары Шурасы, “Татарстан мөслимәләре Шурасы” иҗтимагый оешмасы үткәрә.