“Татарстан – Яңа Гасыр” каналы горизонтларын киңәйтә

100 меңнән артык татар яшәгән төбәктә – Төмәндә, телерадиокомпаниянең чираттагы корпункты ачылды. Әлеге тантанада каналны чираттагы уңышы белән күренекле сәясәт һәм җәмәгать эшлеклеләре котлады. Алар арасында Татарстан кунаклары да бар иде. Корпункт оештыруда Татарстанның Дәүләт Советы һәм республика хөкүмәтенең ярдәме зур булды.

Хәзер Төмәндәге бу филиал ярдәмендә тамашачылар төбәк яңалыклары, татар диаспораларының яшәеше, җитәкчеләрнең эшчәнлеге белән танышып бара алачак. Төмән өлкәсе Мәгълүмат сәясәте департаменты директоры Александр Новонашин котлау мөрәҗәгатендә: “Корпункт инде үз эшен берничә ай элек башлады. Шул вакыт эчендә чыккан материалларда өлкәгә булган хөрмәт күренеп тора. Без каналны татарларны берләштерү факторы итеп кабул итәчәкбез” диде.

8 ел эшләү дәверендә “Татарстан – Яңа Гасыр” каналы күп кенә тамашачыларның күңелен яуларга өлгерде. Моңа кадәр Мәскәү, Екатеринбург, Ижау, Әлмәт, Ульяновскида каналның үз корпунктлары бар иде.