Чувашиядә татар яшьләре форумы булачак

Бөтендөнья татар яшьләре форумы бюросы Чабаксарда үзенең күчмә утырышын уздырырга ниятли. Күптән түгел Чувашия Республикасы башкаласы Чабаксарда уздырылган Татар милли-мәдәни мохтәриятенең яшьләр секциясе утырышында көзен үзләрендә дә татар яшьләре форумы уздыру турында килешенгән (Казанда IV Бөтендөнья татар яшьләре форумы 27-30 августта үткәреләчәк).

Ул башкаланың иң күркәм биналарының берсендә узар дип ниятләнә. Форум делегатлары мәктәпләр, югары уку йортларыннан, оешмалардан сайланачак, кунак сыйфатында башка төбәкләрдән татар яшьләре оешмалары вәкилләре дә чакырылачак, гомумән, республикада яшәүче 37 меңләп татарның күпчелеген яшьләр тәшкил итүен һәм активлыгын исәпкә алып, катнашучылар саны 500дән дә ким булмаячак дип планлаштырыла.

Шул хакта “Азатлык” радиосы әзерләгән материалда әйтелгәнчә, Чувашия татар яшьләре форумы барган көннәрдә Бөтендөнья татар яшьләре форумы бюросы (яшьләр секциясе утырышында алар да катнашкан) Чабаксарда үзенең күчмә утырышын уздыру хакында карар кылган.