Россиянең Гарәп илләре арасында авторитеты арта

Согуд Гарәбстанының иң эре җәмәгать оешмасы – Ислам дөньясы лигасы (Лига исламского мира) оешуына 50 ел тулды. Бу уңайдан Мәккәдә тантаналы чаралар үтте. Аларга 70тән артык илдән, шул исәптән Россиядән кунаклар килде. Күркәм дата уңаеннан оештырылган конференциядә  Россиядән «Собрание» иҗтимагый оешмалар ассоциациясе җитәкчесе Мөхәммәд Сәләхетдинов та катнашты. Сүз уңаеннан, ул әлеге чара вакытында Ислам дөньясы лигасы шурасына кабул ителде.

Лиганың Генераль секретаре Габдулла бен Габдел Мухсин әт-Төрки белән очрашу вакытында М.Сәләхетдинов Россиядәге вазгыять турында сөйләде. Ул илебездә ислам диненең үсүендә дәүләт роленең артуын ассызыклап үтте. Аның фикеренчә, моңа дәүләт ярдәмендә оешытырыла торган махсус оешмалар булу ярдәм итә. Россия җәмәгать эшлеклесе Согуд Гарәбстанының Россиядәге вәкиле Али Джагъфарның эшен югары бәяләде.

Ике як шулай ук оешмалар арасында хезмәттәшлек мәсьәләләре турында да сөйләште. Ислам дөньясы лигасы генераль секретаре, үз чиратында, Россиянең Гарәп илләре арасында авторитеты артуын әйтте һәм Ислам динен кабул итү көнен кертүне хуплавын җиткерде, дип хәбәр итә IslamRF.ru.