Чувашстанда мөселман яшьләре җыены үтте

Кичә Чувашстанның Шыгырдан авылында мөселман яшьләре җыены үтте. Әлеге җыенны Россия мөселманнары Үзәк Диния нәзарәте рәисе урынбасары, Чувашстан мөфтие Әлбир Кырганов җитәкчелегендәге дин вәкилләре оештырды.

Чара 16.00 сәгатьтә башланып, кич буе дәвам итте. Кунакка Мәскәүнең Поклон тавында урнашкан мәчетнең имам-хатыйбы Ринат хәзрәт Галәветдинов, Чувашстанның Батыр районы башлыгы, Түбән Новгород, Татарстан кунаклары килгән иде. Татарстаннан әлеге чарага «Сәләт» яшьләр иҗтимагый фондының актив катнашучыларыннан делегация барды.

«Сәләт» проектлары җитәкчесе Җәүдәт Сөләйманов сүзләренчә, әлеге чакыру алар өчен көтелмәгән булган. «Шыгырдан мин туган авылдан ерак түгел урнашкан. Чувашстан татарлары һәрвакыт актив булдылар. Алар белән элемтә урнаштырырга күптән җыена идек. Ниһаять, андый мөмкинлек туды. Безнең хезмәттәшлек әлеге җыеннан соң ныгыр, дип өметләнәм», - ди Җәүдәт әфәнде. Әлбир хәзрәт Кырганов исә әлеге яшьләр хәрәкәтенең берәр аланын үзләрендә оештыру мөмкинлеге турында да әйтте.

Җыен Чувашстандагы татар авылларында үткән мөселман лагерьларын йомгаклау тантанасы буларак үтте. Бирегә төрле сменаларда ял иткән нәни мөселманнар җыелган иде. Алар өчен төрле ярышлар (көрәш, аркан тартышу, кашыкка йомырка салып йөгерү һ.б. шундый уеннар) үткәрелде. Теләгән кешеләр өчен мәйданда концерт программасы да оештырылган иде.

Җыен барышында бөтен кунакларны да тәмле пылау, төрле сыйлар белән кунак иттеләр.