Чечняда инвалидларны эшкә урнаштыралар

Чечня Президенты Рамзан Кадыйров республиканың хезмәт, мәшгульлек һәм социаль үсеш министры Магомед Әхмәтов белән очрашуында сөйләшенгән төп мәсьәлә мөмкинлекләре чикләнгән кешеләрне эш белән тәэмин итү программасын тормышка ашыру булды.

М.Әхмәтов әйтүенчә, бу программа мөмкинлекләре чикләнгән бик күп гражданнарга даими эш урыны табарга ярдәм иткән. Шулай ук аларга үз эшләрен ачу мөмкинлеге дә тудырылды, дип хәбәр итә Чечня Президенты матбугат хезмәте.

«Федераль үзәк безнең министрлык эшләгән программаны хуплады, - ди министр. – Бүгенгә 17 инвалид эшкә урнаштырылган. Министрлык аларга хезмәт хакы түләү өчен оешмаларга акча күчереп бара. Моннан тыш, үзмәшгульлек юнәлеше буенча 150 кеше үз эшен ачып җибәрү өчен субсидия алды».

М. Әхмәтов шулай ук министрлыкның бу юнәлештә эшне күрмәүчеләр, чукрак-телсезләр һәм инвалидар җәмгыятьләре белән бергә алып баруын әйтте. Чукрак-телсезләр җәмгыяте белән, мәсәлән, тегү фабрикасы ачылган. Өр-яңа тегү машиналары белән җиһазландырылган фабрика махсус киемнәр тегү өчен дәүләт заказларын кабул итәргә әзер. Рамзан Кадыйров фабрика ачылу инвалидларга ярдәм итүнең бик яхшы чарасы булуын белдерде һәм министрлыкка массакүләм мәгълүмат чаралары аша тормышка ашырыла торган программалар турында халыкка җиткереп тору бурычын куйды.