Кабарда-Балкар республикасының Баксан ГЭСында шартлау булды

Кабарда-Балкар республикасының Баксан ГЭСында шартлау булды. Шартлау машина залында килеп чыга. Кабарда-Балкар республикасы хокук саклау органнары хәбәр итүенчә, бүген иртәнге 4.20 сәгать тирәсендә ГЭС бинасына шикле кешеләр бәреп керә. «Алар ике сакчы егетне үтергәннәр, станция хезмәткәрләрен кыйнаганнар. Смена башлыгы һәм аның ярдәмчесе хәзер хастаханәдә. Билгесез кешеләр станциянең машина залына шартлаткыч матдәләр куялар һәм аларны 5.20 сәгатьтә шартлаталар», - дип хәбәр иткән хокук сакчылары ИТАР-ТАСС агентлыгына.

«РусГидро»ның Кабарда-Балкардагы филиалы матбугат хезмәте мәгълүматлары буенча, станциядә 4 шартлау була. Беренче шартлау 5.20 минутта яңгырый. Калган ике шартлаткыч матдә 5-10 минуттан соң хәрәкәткә килә. Ә дүртенче шартлау исә хокук сакчылары килеп, шартлаткычларны көчсезләндергәндә килеп чыга.

Хокук сакчыларының төп версиясе - террор акты. Хәзергә станция эшчәнлеге туктатылган. Баксан ГЭСы эшләүдән туктау Кабарда-Балкар республикасында электр энергиясенә кытлык китереп чыгармаячак, дип ышандыра белгечләр. Моның өчен башка электр станцияләрендә эш күләме арттырылган, дип хәбәр итә ИТАР-ТАСС.