Кыргызстанның Ош шәһәрендә комендант сәгате кыскарды

Бер ай элек Ош шәһәрендә булган канлы бәрелешләрдән соң илнең көньягында комендант сәгате кертелгән иде. Кичке якта шәһәрдә хәрәкәт итү буенча кертелгән чикләүләр бүген йомшартылган. Бу турыда комендантның матбугат хезмәтенә сылтама белән REGNUM мәгълүмат агентлыгы хәбәр итә.

Бүгеннән Ош өлкәсенең Ош, Өзген шәһәрләрендә һәм Араван, Кара Сөй районнарында комендант вакыты берничә сәгатькә кыскартыла. Хәзер кичке 22.00 сәгатьткә кадәр урамда йөрергә мөмкин. Комендант вакыты иртәнге 5.00 сәгатькә кадәр дәвам итә. Моңа кадәр 20.00 – 6.00 аралыгында урамда йөрү тыела иде.

Матбугат хезмәте хәбәр итүенчә, Кыргызстанның көньягында хәлләр тотрыкланып килә. Авыл халкы уңыш җыярга тотынуы да комендант сәгате кыскаруга бер сәбәп булып тора. Шулай ук соңгы арада шәһәр халкы тыюларны киметүне сорап җитәкчелеккә мөрәҗәгать иткән.

Әмма Кыргызстанның көньягында комендант сәгате 10 августка кадәр дәвам итәчәк.