Әзәрбайҗанда тиздән «яшел», «сары» һәм «кызыл» исемнәр булачак

Әзәрбайҗанда хәзер исемнәр рөхсәт ителгән һәм тыелган төрләргә аерылачак. Мондый исемлек төзү турында Милли Фәннәр Академиясе каршындагы Мәгълүмати технологияләр институты директоры "Trend” сайтына хәбәр иткән.

Алигулиев әфәнде сүзләренчә, әлегә илнең алдынгы галимнәре исемнәрне анализлый. Анализ тәмамлангач, исемлек  Юстиция министрлыгына тапшырылачак. Иң кызы, исемнәрне «светофор» механизмы буенча төркемлиләр.

«Светофор» принцибы түбәндәгедән гыйбарәт. Әзәрбайҗан халкының милли-мәдәни кыйммәтләренә туры килә торган исемнәр «яшел» исемлеккә кертеләчәк һәм бу исемнәрне сабыйларга кушуда чикләүләр булмаячак. «Сары» исемлеккә исә кушырга киңәш ителмәгән исемнәр кертелгән. Алар арасында – ямьсез яңгырашлы, кимсетү тудырырлык исемнәр. Өченче, «кызыл» исемлеккә исә бөтенләй тыелган исемнәр кертеләчәк. «Кызыл» исемнәр арасында әзәрбайҗан халкы язмышын тискәре йогынты ясаган, мәгънәви яктан ямьсез, мәгънәсез исемнәр булачак.

Исемнәр кушуның яңа механизмы бу ел ахырында ук гамәлгә кертелер, дип планлаштырыла.