Болгариядә паспорт өчен фотога яулыктан да төшәргә мөмкин

Франциядә пәрәнҗәне тыйсалар, Болгариядә мөслимәләргә яулык япкан килеш паспортка фотога төшәргә рөхсәт ителде. 

Болгариянең Смолянски өлкәсе мөфтие Нәҗми Дыбов Куркынычсызлык министрына хат җибәргән иде. Әлеге хатта мөслимәләргә ни өчен яулыксыз фотога төшәргә ярамаганлыгы аңлатылган, җитәкчелектән яулыктан фотога төшүне рәсми рәвештә рөхсәт итү соралган иде.

Төбәк хакимияте әлеге хатка шунда ук игътибар итә. Мөфтинең мөрәҗәгате уңай карала. Хәзер мөслимәләргә паспорт өчен яулыктан гына да фотога төшәргә мөмкин, дип хәбәр итә «Исламский портал» сайты.

Novinite Болгар мәгълүмат агентлыгына биргән әңгәмәсендә җитәкчелек вәкиле Мирослав Стоянов исә бу уңайдан мөселманнарның мөрәҗәгатен рәсми органнар беркайчан да игътибарсыз калдырмый, дип белдерде. Аның сүзләренчә, ил гражданнарының хокукы һәрвакыт сакланырга тиеш. Өстәвенә, бер генә законда да яулыктан фотога төшәргә ярамый, дип язылмаган.