Европа пәрәнҗәгә каршы чыга

Франция, Германия, Британия һәм Испаниядә яшәүчеләрнең күпчелеге җәмәгать урыннарда пәрәнҗә киеп йөрүне тыю ягында тора. Ә менә американлыларның күпчелеге мондый фикерне хупламый.

Американың «Pew» тикшеренү үзәге үткәргән сораштыруның нәтиҗәләре шуны күрсәтә: пәрәнҗәдә йөрүне тыярга теләүчеләр саны буенча беренче урында Франция тора - 82 %. Аннары Германия (71 %), Британия (62 %), Испания (59 %) бара. Америкада исә нибары 28 % кеше генә пәрәнҗәгә каршы чыга. 65 % американлы пәрәнҗәне тыюга каршы. Шунысы да кызыклы, тыю ягында нигездә 55 яшьтән олырак кешеләр тора.

Бу атнада Франциянең Милли җыены илдә пәрәнҗәдә йөрүне тыючы закон проектын хуплады. Сентябрьдә әлеге законны илнең Сенаты карый башлаячак. Сенат әгъзалары да законны хуплаган очракта, Европада пәрәнҗә киеп йөрүне тыйган тагын бер ил булачак. Элегрәк мондый карарны Бельгия кабул иткән иде, дип хәбәр итә «Интертат».