Франциядә пәрәнҗә язмышын хәл итәләр

Франция парламентының түбән палатасы бүген җәмәгать урыннарында пәрәнҗә киюне тыя торган закон проектын тикшерә. Бу канун бик зур шау-шу куптаруга карамастан, белгечләр аны кабул ителер, дип исәпли.

Бу уңайдан Милли ассамблея бинасында саклык чаралары көчәйтелгән. Мондый гауга куптарган закон проекты Франциядә соңгы арада булмады. Сораштырулар күрсәткәнчә, франциялеләрнең күпчелеге җәмәгать урыннарында пәрәнҗә киюне тыю яклы. Әмма Европа илләре арасында иң зур мөселман диаспорасы булган Франциядә (якынча 5-6 миллион кеше) бу мәсьәлә берьяклы гына хәл ителә алмый. Кайбер белгечләр хәтта бу канунны кабул итү радикаль хәрәкәтләргә этәргеч булачак, дип фаразлый.

ИТАР-ТАСС бу мәсьәләне хәл ителгән, дип саный. Чөнки уң партияләр социалистлар белән уртак тел таба алган. Тавыш бирү Мәскәү вакыты буенча 17 сәгатьтән соң башланырга тиеш.

Әгәр дә бүген түбән палатада канун кабул ителсә, пәрәнҗәнең киләчәге Сенат һәм Дәүләт Советы тарафыннан хәл ителәчәк.