«Яңа гасыр» радиосында «Хикмәти дөнья» проекты башлана

11 июльдән «Яңа гасыр» радиосында «Хикмәти дөнья» проекты башланачак. Аның кысаларында тыңлаучылар туры эфирга шалтыратып яисә редакциягә хат язып, доганың катлаулы мизгелләрдә аларга ничек ярдәм итү вакыйгаларын башка тыңлаучылар белән бүлешә ала. Проектның партнеры – ТР Дәүләт Советы депутаты, Казан хаҗилары җәмгыяте рәисе Фәрит Мифтахов.

Электрон хатларны ilnurf@mail.ru адресына юлларга мөмкин. Шалтыратулар (843) 570-50-97 телефоны буенча кабул ителә.

«Яңа гасыр» радиосы эфирында җырлар, күңел ачу программаларыннан тыш, ислам диненә багышланган тапшырулар да чыга. Мәсәлән, «Хак дин» тапшыруы 2008 елда Мөселман ММЧлары конкурсында «Ислам турында иң яхшы программа» номинациясендә җиңү яулый. 2010 елда исә шул ук бүләккә «Сөенче» балалар тапшыруы лаек була.

Рамазан ае вакытында радиода махсус сәхифәләр булдырыла. Мәсәлән, сәхәр һәм авыз ачу вакытында радио аша азан, Коръән сүрәләре яңгырый.