Айгөл Батыршинадан талкыш кәләвә рецепты

Әлмәт шәһәрендә яшәүче, талкыш кәләвә ясау белән ничә еллар шөгыльләнүче Айгөл Батыршина рецептын сезгә дә тәкъдим итәбез.

Әлбә өчен: 85 грамм он, 85 грамм сары май;

Ширбәт өчен: 225 грамм шикәр, 75 грамм бал, 125 грамм су

1. Иң элек әлбә әзерлибез. Аның өчен башта сай савытта май эретәбез, өлешләп кенә он салып, болгата-болгата пешерәбез. Әзер булуын өстендә тигез булып яткан майдан билгелибез. Әлбә ачык көрән төскә керә һәм аннан чикләвек исе килә.
2. Икенче тирәнрәк савытта су, шикәр комы һәм бал кушып, кызгылткөрән төскә кергәнче баллы-шикәрле масса (карамель) кайнатабыз.
3. Әлбәне баллы-шикәрле (карамель) кайнатма белән кушабыз да, нечкә җепләр чыкканчы тартабыз.
4. Ак җеп кебек аерыла башлаган тиз сынучан җепселләрне формалаштырбыз. Шушы җепселләрне махсус формага  тутырабыз да, әйләндереп салабыз. Матур кәләпүш сыман кәләвәләр килеп чыга.

Нечкәлекләр:

1. Эш барышында барысын бик тиз эшләргә кирәк. Айгөл ханым әйтүенчә, талкыш кәләвә көтеп торырга яратмый, чөнки 7 минутта дигәндәй аның әлбәсе пешә, 15 минутта ширбәте дә була.
2. Карамель катып китмәсен өчен, аның кырыйларын һәрьяктан кашык яки пычак белән күтәртеп, әйләндереп торырга кирәк.
3. Карамель белән әлбәне тарту өчен ике кат резин перчатка  кию киңәш ителә.
4. Әзер талкыш-кәләвәне эреп төшмәсен өчен салкын урынга кую кирәк.

Ләйсән Сафина