Зиннәтулла Биләлетдинов: Хоккейчыларның уенга җитди каравыннан канәгать калдым

Кичә Казаның “Ак Барс” хоккей командасы Новокузнецкида җирле “Металлург” белән очрашты һәм көндәшләрен 3:1 исәбенә җиңүгә иреште. Бу казанлыларның сентябрь аенда Татарстан башкаласында әлеге командага оттыруына үч алу булып яңгырады һәм “барс”ларның өченче тапкыр рәттән отуы булды.

“Без уенга җитди рәвешле әзерләндек. Моннан алдагы көндә биредә Магнитогорск “Металлург”ын откан булганнар. Шуңа күрә гадәти булмаган уен көттек. Гомумән алганда, мин хоккейчыларның уенга җитди каравыннан һәм җиңү яулавыннан канәгать калдым»,-дигән казанлыларның баш тренеры Зиннәтулла Биләлетдинов уен тәмамланганнан соң.

Новокузнецк командасы баш тренеры Герман Титов: “Магнитогорск командасы белән очрашканнан соң, казанлылар белән уйнарга хоккейчыларның көче калмаган булып чыкты. Алдагы уенга бик күп көч куелды. Беренче һәм өченче периодларда безнекеләр шактый яхшы уйнады, ә икенче периодта алар тулысынча оттырды. Уен буенча хоккейчыларга ризасызлыгым юк, алар тырыштылар”,-диде.

Чыганак: “Татар-информ”