Варфоломей төне нәрсәне аңлата?

1572 елның 24 августына каршы төндә, ягъни моннан 443 ел элек Парижда Изге Варфоломей истәлегенә үткәрелүче бәйрәм алдыннан, католикларның протестантлардан үч алуы башлана. Аны тол калган Франция королевасы Екатерина Медичи һәм Лотарингия герцогы Генрих де Гиз оештыра. Соңгысы күпсанлы, йогынтылы Католиклар Лигасы партиясен оештырган һәм җитәкләгән була.

Варфоломей төне, дип аталучы бу вакыйга гугенотларның әйдаманы король Генрих Наваррский белән католиклар принцессасы Маргарита Валуаның өйләнешүеннән берничә көн узгач килеп чыга. Протестлар монархы белән Екатерина Медичиның кызы туе Франциядәге төрле конфессия вәкилләре арасындагы мөнәсәбәтләрне ныгытырга тиеш була. Тик, чынлыкта, Католиклар Лигасына үзенең сәяси дошманнарын юкка чыгару өчен ул бик җайлы мөмкинлеккә әйләнә. Король Генрихның туена Парижга бу вакытта күпләгән протестант дворяннар җыела.

Караңгылыкта үтерүчеләр үз корбаннарын эзләп табуда ялгышмасын өчен Париж католикларына үз шләпәсенә ак тәре ябыштырырга кушыла.

Сен-Жермен аббатлыгында кыңгырау шалтыраганнан соң (ә ул суешлар башлануга сигнал булып тора), Парижда 10 меңнән артык кеше үтерелә. Католикларның террорлык дулкыны аннары провинциаль шәһәр һәм авылларга тарала, протестантларны ерткычларча үтерүләр берничә атнага сузыла.

Тарихчылар Варфоломей төне корбаннары күпме булуы хакында әлегә кадәр бәхәсләшә. Биредә 5 меңнән алып, 30 меңгә хәтле саннар китерелә. Әлеге суешта күпчелек гугенот әйдаманнары үтерелә. Ә адмирал де Колиньеның башын Генрих Гиз аяклары астына ташлыйлар.
Чыганак: "Татар-информ"